LOS Gruppen har nyleg offentleggjort konkrete planar for vidare utviding av industriområdet på Rubbestadneset, med ny dokk, tilhøyrande kaiar, lager og næringsbygg. Målet er å styrkje den maritime klynga i Sunnhordland og posisjonere Rubbestadneset som ein endå viktigare base for framtidas forsvarssatsing og skipsfart.
Rubbestadneset rommar i dag ei komplett maritim verdikjede, med skipsservice, vedlikehald og framdriftskompetanse i verdsklasse. LOS Marine, LOS Elektro og Wärtsilä Norway utgjer eit sterkt og samansett miljø, med rask responstid, kort liggetid og tilgang på kritiske ressursar rett ved kai. Dette gir området ei sentral rolle både innan sivil skipsfart og i beredskapssamanheng.
Området er ferdig regulert for vidare utvikling, med moglegheit for utvida ISPS-kai, ny dokk, meir landareal og betre fasilitetar for samtidige prosjekt. LOS Gruppen arbeider no aktivt med å få inn investorar og samarbeidspartnarar for å realisere planane og styrkje kapasiteten på Rubbestadneset ytterlegare.
I samband med planane fekk LOS Gruppen denne veka besøk av stortingsrepresentant Rune Bakervik (Ap), medlem av utanriks- og forsvarskomiteen. Under besøket fekk Bakervik ei grundig orientering om utbyggingsprosjektet og framtidsplanane for området, samt ein rundtur for å sjå fasilitetane som allereie er på plass.
Bakervik gav uttrykk for at han var imponert over både samarbeidet i den maritime klynga og omfanget av fasilitetane på området. Han peikte særleg på samspelet mellom næringslivet og vidaregåande skule på Rubbestadneset som unikt og viktig for framtidig rekruttering og kompetansebygging.
